Биыл қазақтың балалар әдебиетінің классигі Бердібек Соқпақбаевтың туғанына 100 жыл. Қаламгердің мерейтойы ЮНЕСКО көлемінде аталып өтті.
Жазушының мерейтойына орай 2024 жылғы қазанның 18 жұлдызы күні «Арыстан» мамандандырылған лицейінің акт залында лицеистерге берер тағлымы мол ауқымды кеш өтті. Кешті лицейдің қазақ тілі мен әдебиеті пәнінің мұғалімі Шоранова Гүлдария Әжіғұлқызы ұйымдастырды. Кешке лицеистерден басқа лицей ұстаздары мен рота командирлері де қатысты.
Лицеистерге жазушының балалық шағы мен есейген шағындағы өмірі туралы және өзі туған Нарынқол ауданының орталығында әйгілі сөз зергеріне деген қадір-құрметтің белгісі ретінде қойылған ескерткіштің ашылуы жайында әсерлі бейнебаяндар көрсетілді. 9-сынып лицеистері Абайұлы Ануар, Жұмабек Шыңғыс, Мұхаметжан Ильяс, Ибрагимов Бексұлтан, Қазыбек Абдулкарим, Сейілбек Шерзатхан жазушыға арнап жазған ақын Бейсебай Кіріспайұлының «Бәйтерек» өлеңін патриоттық тұрғыда сезіне жырлады. Бұдан соң сахнада лицеистер жазушы Б.Соқпақбаевтың шығармашылық мұрасымен жақынырақ танысу үшін 10 «Г» сынып лицеистері Жаргалиев Талант пен Берденов Ералы дайындаған буктрейлерді тамашалады.
Жазушының 1957 жылы жарыққа шыққан «Менің атым Қожа» повесі балалардың сүйіп оқитын шығармасына айналып, орыс, украин, француз, литва, латыш, өзбек тілдеріне аударылған болатын. 1963 жылы «Қазақфильм» студиясы осы кітап бойынша көркем фильмін шығарды. Фильм 1967 жылы француздың Канн қаласындағы жастар мен балаларға арналған кинофильмдердің халықаралық фестивалінде арнайы сыйлыққа ие болған еді. Осы фильмнің қызықты бір көрінісін сахнаға 10 «Б» сынып лицеистері Қожа рөлінде– Алмаз Алдияр, Сұлтан рөлінде – Бекешев Әділхан болып ойнап шықты. Бұл көрініс барлық лицеистердің көңілінен шығып, олардың ыстық ықыласына ие болды.
Кеш соңында «Менің атым Қожа» филімінен алынған сұрақтарға жауап беру үшін «Кім тапқыр?» ойынын 10 «А» сынып лицеисі Ердәулет Сұлтан мен Өміралиев Жансерік ортаға шығып көрермендерге жүргізді. Жақсы жауап берген лицеистерге сыйлықтар үлестірілді.
Кеш қонағы болған Лицей басшысының тәрбие ісі жөніндегі орынбасары полковник Бельгибеков Қанатбек Ербосынұлы кештің тәрбиелік мәнін айта отыра, лицеистерді жазушы Бердібек Соқпақбаев шығармаларымен сусындаған Отанымыздың білімді ұлдары болуға шақырды. Болашақ әскери маман болатын жас жігіттер қазақ мәдениетінен алатын үлесі мол жазушының болашаққа қалдырған мұрасына құрметпен қарау керек екеніне көз жеткізді.
