Атадан балаға мұра болып қалатын байлықтың қайнар көзі - жер мен елдің тұтастығы. Оны елін сүйген ер азаматтың жүрек түкпірінде берік орнығатыны анық. Отанымыздың қауіпсіздігін ойлаған ата-бабаларымыз толассыз шапқыншылық пен жаугершілік жағдайында да кең байтақ Қазақстан территориясының тұтастығын сақтап қала алды. Қазақтар қаншама жойылудың қыл алдында тұрды. Алайда өмірге деген, бостандыққа деген құлшыныс, ерік-жігер халықтың еңсесін түсірмеді. Ізетті де тектінің бүгінгі тұяқтары әскери көшбасшы, қазақтың ұлы тұлғасы Кеңесары хан, даңқты ерлер: Қабанбай, Бөгенбай, Райымбек, Қарасай, Наурызбай, Исатай, Махамбет және Бауыржан Момышұлы есімдерін ешқашан естен шығармайды. «Ат тұяғын тай басар» демекші, ерлік эстафетасы атадан балаға, ұрпақтан ұрпаққа, ғасырдан ғасырға жалғаса бермек. Аталмыш тұлғалармен қатар біз ұлттық батыр, талантты әскери басшы, Кеңестер Одағының Батыры, Халық Қаһарманы, армия генералы Сағадат Нұрмағамбетовтың атын аса құрметпен атай аламыз.
Бүгінде Қазақстан армиясы офицерлерінің бірнеше буыны үшін, жоғары әскери оқу орындарының курсанттары мен республикалық әскери мектептердің тәрбиеленушілері үшін Сағадат Нұрмағамбетов табандылықтың, батылдықтың және өз Отанына жанқиярлықпен берілгендіктің ерекше үлгісі –Аңыз адам болып қала береді.
Жұмысты жалындап істеу, елдің игілігі үшін өмір сүру – тек таңдаулылардың үлесі. Осындай адамдардың бірі Сағадат Нұрмағамбетов – оның есімі адамның ең жақсы қасиеттерін –азаматтық батылдықты, жоғары парыз сезімін, патриотизмді және сарқылмас өміршеңдікті білдіреді.
2023 жылғы 25 мамырда Сағадат Қожахметұлы 99 жасқа толар еді.
Армия генералы, тәуелсіз Қазақстан Республикасының Тұңғыш Қорғаныс министрі, Кеңес Одағының Батыры, Халық Қаһарманы Сағадат Қожахметұлы Нұрмағамбетов Тәуелсіз Қазақстан армиясының қалыптасуында маңызды рөл атқарды. Оның бастамасымен елімізде әскери кадрлар дайындала бастады, Қазақстан Республикасы Қарулы Күштерінің дәстүрлері мен берік негіздерін қалыптастырды. Ол қазіргі қазақстандық армияның мақтанышы және құрушысы болды.
2023 жылы 21 мамырда «Арыстан» Лицейінде «Аңызға бергісіз ғұмыр» атты С.Қ. Нұрмағамбетовке арналған Тақырыптық ертеңгілік өтті.
