Жыр алыбы – Жамбыл

   Жыр алыбы Жамбылдың ақындық өнерін шәкірт жүрегіне ұялатып, лицеистердің сөйлеу мәдениетін дамыту мен ақын шығармашылығын кеңінен насихаттау мақсатында «Арыстан» мамандандырылған лицейінде 2021 жылдың 26 қазанында қазақ тілі мен әдебиеті пәнінің оқытушысы Ж.А.Исабекованың ұйымдастыруымен «Жыр алыбы - Жамбыл» атты лицейішілік ертеңгілік өтті. Ертегілікке лицей бастығы генерал-майор С.С.Тауланов, Ж.Жабаев атындағы мұражайдың меңгерушісі, ақынның немересі С.Т.Жамбылова, лицей бастығының тәрбие ісі жөніндегі орынбасары В.А.Райхель, қазақ тілі мен әдебиеті пәнінің ұстаздар Г.А.Шоранова, Ж.Т.Өміржанова қатысты.
   Биыл қазақтың қара өлеңін кие тұтқан, асыл жырларымен туған елі мен әлем халықтарының махаббатына бөленген Жамбыл Жабаев 175 жасқа толып отыр. Халық поэзиясының алыбы атанған Жамбыл Жабаевқа арналған ертеңгілігіміз ақын өмірі мен шығармашылығы туралы кинодан басталды. Ақынның өмірі жайлы үзіндіден кейін Жамбылдың 14 жасында жырдың пірі Сүйінбай ақыннан бата алғаны мен Сүйінбайдың өз домбырасын Жамбылға тарту еткен тұсы, Жамбыл мен Құлмамбет айтысы экранда көрсетілді.
   Сахнада 9-10-сынып лицеистері Үмітқали Аман, Қазтай Сұлтанәлі, Нүкенов Сұлтан, Шаханов Бекарыс, Рысқұл Айбар, Қамзабек Бекзат, Ғалым Абылай ақын өлеңдерін жатқа оқып, «Жамбыл оқуларын» насихаттады.
   Ертеңгілікте Жамбылдың Ұлы Отан соғысы жылдарында жазылған «Ленинградтық өренім!» өлеңіне ереше тоқталып, арнайы сюжеттер көрсетілді. Аталған өлеңді 10-сынып лицеистері Көшербаев Сағадат пен Маликов Ерсұлтан театрландырылған қойылым ретінде көрермендер назарына ұсынды.
   Қойылымнан кейін лицейіміздің қонағы Ж.Жабаев атындағы мұражайдың меңгерушісі, ақынның немересі Салтанат Тезекбайқызына сөз берілді. С.Т.Жамбылова лицеистерге өз тілегін айта отырып, Жамбыл Жабаевтың өмірі мен шығармашылығынан сыр шертетін мұражай мұрағаттарымен таныстырды. Мұражай қорынан арнайы әкелген ақынның шапаны, домбырасы, марапат ордендері мен шағармалар жинағы лицеистердің назарына ұсынылды.
   Ертеңгілік барысында ҚР Композиторлар Одағы төрғасының орынбасары, ҚР Композиторлар Одағының мүшесі, «Арыстан» мамандандырылған лицейінің музыка үйірмесінің мұғалімі Х.З.Сетеков Жамбылға арнап шығарған әннің сөзі мен нотасын мұражай қоры үшін ақынның немересіне тапсырды.
   Жамбыл Жабаевтың шығармашылығына арналған ертеңгіліктің қорытынды сөзін В.А.Райхель алды. Ол тәрбие сағатының қонақтарына өз алғысын білдіріп, лицейіміздің атынан естелік суреттер мен жинақтарды, ескерткіштерді сыйға тартты.
   Аталған тәрбие сағатында Жамбыл Жабаев шығармалары арқылы лицеистеріміздің ұлтжандылық сезімін оятып, оларды адамгершілікке, елінінің өнерін сүюге тәрбиелеу сынды мақсаттар толыққанды жүзеге асты.
   Ертеңгілік лицеистеріміздің мұражай мұрағаттарын жақыннан тамашалап, арнайы келген қонағымыз ақынның немересі, Ж.Жабаев мұражайының меңгерушісі С.Т.Жамбыловамен суретке түсумен өз мәресіне жетті.

<>