Үстіміздегі жылдың қаңтар айының 29 жұлдызында сүйікті шаңырағымыз,«Арыстан» мамандандырылған лицейінде, өнер туын көкке желбіретіп жүрген құдіретті әкемтеатрдың, Мұхтар Әуезов атындағы қазақ мемлекеттік академиялық драма театрының, актерларымен кезекті кездесу өтті.
   Бұл шығармашылық кештің негізгі мақсаты қазақ халқының ұлы ақыны Абай Құнанбаевтың 175 жылдық мерейтойы қарсаңында М.Әуезов атындағы Қазақ Мемлекеттік академиялық театр өнерімен, «Абай» трагедиясында басты кейіпкерлердің өлін сомдаған театр актерларымен жетене танысу, пікіралмасу, көрермен мен театр ұжымының байланысын одан әрі нығайту болып табылды.
   Сүйікті театрымыздың актерлары, атап айтқанда Қазақстанның еңбек сіңірген қайраткері, «Құрмет» орденінің иегері, «Абай» трагедиясында қазақтың бас ақыны Абайдың рөлін сомдаған театр саңлағы Әбділманов Болат Мәзімбайұлы, Қазақстан Жастар одағы «Серпер» жастар сыйлығының лауреаты, әнші, әрі актриса, «Абай» трагедиясында Мағыштың рөлін сомдаған Қалдыбекова Ляззат Әбішқызы, дарынды жас актер, «Дарын» жастар сыйлығының лауреаты , «Абай» трагедиясында Әбдірахманның рөлін сомдаған Оспанов Ғалымбек Алпамысханұлы лицей сахнасының төрінен көрінді.

   Ұлттық, әлемдік классика мен заманауи драматургияда қайталанбас бейнелерімен, соның ішінде ширек ғасырдан аса сомдаған ұлы Абай бейнесімен халықтың ыстық ықыласына бөленген, кино мен театр саласындағы еңбегімен еліне елеулі болған өнерпаз актер Болат Мәзімбайұлы лицей сахнасынан Абай монологын оқығанда, лицеистер демін ішіне алып, бар ынтасымен тыңдап, Абай әлеміне үңілгендей болды...
   Жас та болса, атағы бар, халық көңілінен шыққан, жүрегінен орын алған актер Оспанов Ғалымбек акапеламен ән айтып, Ляззат Әбішқызымен «Абай» трагедиясынан көрініс көрсетіп, лицей ұжымы мен шәкірттерін тамсандырды.
   Биылғы жыл – Абай жылы болғандықтан, бүкіл Қазақстанда болып жатқан іс-шаралардан біз де тыс қалмадық. Лицеистеріміз Абай поэзиясына саяхат жасап, өздері жаттаған ән мен өлеңдерін қонақтарымызға шын жүректен паш етті.
   Тағылымы мол кеш барысында лицеистердің толассыз сұрақтарына жауап бере отырып, өнер тарландары өзіндік ұстанымымен, берік көзқарасымен, өнерге деген адалдығымен, болашақ жастарға айтқан ақылымен үлкен қошеметке ие болды.
   Өткізілген кездесу мазмұнды кешке айналды. Қатысушылардың жүзіне күлкі ұялатып, терең ойға батырған кеш шәкірттеріміздің көңілінде ұзақ сақталатыны анық.
   Өнер майталмандары мамандандырылған «Арыстан» лицей өрендерін тәуелсіз елдің рухын көтерер туындыларымен сусындата береді деген сенімдеміз.